Vlora Braha flet për Programin “Safeguarding” në Forumin e Sportit

Zyrtarja për Integritet në Federatën e Basketbollit të Kosovës (FBK), Vlora Braha, ishte paneliste në Forumin e Sportit, në kuadër të Javës Evropiane të Sportit.

Braha ishte pjesë e panelit të dytë, ku foli për rëndësinë e Projektit “Safeguarding”, si dhe si zbatohet në FBK.

Në fokus të diskutimit ishin mbrojtja e sportistëve dhe standardet e safeguarding, krijimi i një ambienti të sigurt, gjithëpërfshirës dhe me respekt në sport, si dhe rëndësia e ngritjes së mekanizmave që mbrojnë integritetin dhe mirëqenien e të gjithë pjesëmarrësve në aktivitetet sportive.

Pjesëmarrja e Zyrtares për Integritet të FBK-së në këtë panel është në vazhdën e angazhimit të Federatës për promovimin e standardeve të integritetit, sigurisë dhe mbrojtjes së sportistëve, me theks të veçantë te krijimi i një mjedisi të shëndetshëm dhe të sigurt për të gjithë komunitetin e basketbollit.

Edhe Sekretarja e Përgjithshme e FBK-së, Elvira Dushku si pjesëmarrëse në këtë Forum, ka treguar se sa zbatohet në Federatën e Basketbollit dhe sa i rëndësishëm është ky Projekt.

Krahas Brahës, pjesë e panelit ishin edhe Mimika Dobroshi nga Erasmus+/Komisioni Evropian, Iliria Ibrahimi nga Komiteti Olimpik i Kosovës, Tringa Dedi nga Universiteti i Prishtinës dhe Musa Selimi nga Universiteti i Prishtinës/SHAPE.

Në panelin e parë është diskutuar për temën: “Sporti i së Ardhmes: Inovacioni, Qëndrueshmëria dhe Investimet”, Pikat kryesore të diskutimit ishin: Infrastruktura e mençur, sporti dhe shëndeti, Partneritetet publiko-private dhe investimet për sport të qëndrueshëm dhe Diskutim i hapur dhe pyetje-përgjigje (Q&A), ku kanë folur Ibër Alaj – Koordinator Nacional, Ismet Krasniqi - President i Komitetit Olimpik të Kosovës dhe Florian Miftari – Universiteti i Prishtinës.

Kryetari i FBK-së, Arben Fetahu, i cili mori pjesë në këtë Forum theksoi se, qëllimi është me të qenë sa më aktiv si sportist dhe kjo të jetë pjesë e disiplinës dhe kulturës sportive, ndërsa Federatat duhet të punojnë edhe në Programet zhvillimore, jo vetëm sa i përket infrastrukturës, por edhe sportistëve.

Forumi u zhvillua në kuadër të Javës Evropiane të Sportit, ndërsa projekti është financuar nga Komisioni Evropian dhe Erasmus+, me pjesëmarrjen e përfaqësuesve të institucioneve sportive, universitare dhe organizatave të ndryshme.

‍