Në bazë të nenit 24 të Statutit të Federatës së Basketbollit të Kosovës, Bordi i FBK-së shpall:

KONKURS

për organizimin e Final 4 Liga Unike Meshkujt në basketboll, për edicionin 2024/25, që do të zhvillohet më 26 dhe 27 mars 2025.

1. KUSHTET E PËRGJITHSHME

Të drejtë konkurrimi kanë të gjithë personat juridikë që përmbushin kushtet e këtij konkursi. Organizatori i përzgjedhur do të nënshkruajë kontratë me FBK-në, ku do të specifikohen detajet e organizimit si dhe obligimet e të dyja palëve.

2. KUSHTET DHE PËRGJEGJËSITË E ORGANIZATORIT

Kandidatët duhet të plotësojnë dhe të garantojnë përmbushjen e kritereve të mëposhtme:

1. a) Të sigurojë kushte optimale për zhvillimin e ndeshjeve sipas rregullave të lojës së FIBA-s, Propozicioneve të Garave të FBK-së, si dhe akteve tjera normative në fuqi të Federatës;
2. b) Të garantojë një palestër që përmbush standardet e kërkuara, duke përfshirë:

• Kapacitet minimal prej 2,000 vendesh për shikues;
• Fushë me përmasa dhe cilësi të miratuara nga FBK;
• Pajisje teknike, tabela elektronike, sistem ndriçimi dhe statistika live sipas kërkesave të FIBA-s.

1. c) Të sigurojë medaljet, kupat dhe trofetë për fituesit dhe finalistët, sipas dizajnit të miratuar nga FBK;
2. d) Të mbulojë shpenzimet për personat zyrtarë (gjyqtarë, delegatë, personel teknik etj) për të gjitha ndeshjet e Final 4 Liga Unike Meshkujt, dhe t’i transferojë të hollat tek FBK para fillimit të eventit;
3. e) Të mbulojë shpenzimet për reklamat LED për të gjitha ndeshjet e Final 4;
4. f) Të mbulojë shpenzimet për akomodimin e ekipit të Besëlidhjes, si dhe personave zyrtarë të ndeshjeve nga Federata Shqiptare e Basketbollit (FSHB);
5. g) Të sigurojë prezencë të mjaftueshme të forcave policore dhe pjesëtarëve të sigurimit privat për të garantuar sigurinë e lojtarëve, stafit, zyrtarëve dhe spektatorëve;
6. h) Të organizojë mbulimin mediatik të eventit, duke përfshirë:

• Promovimin dhe reklamimin e eventit përmes mediave dhe rrjeteve sociale.

1. i) Të ketë një plan të qartë të financimit dhe mbulimit të shpenzimeve, duke përfshirë mundësitë për sponsorim dhe të ardhura nga biletat.
2. PËRFITIMET DHE TË DREJTAT E ORGANIZATORIT

Organizatori i përzgjedhur do të ketë të drejtën e:

• Shitjes së biletave për eventin;
• Përdorimit të hapësirave për sponsorë dhe reklama brenda palestrës;
• Organizimit të aktiviteteve shtesë brenda kuadrit të eventit, me miratimin e FBK-së.

4. PROCEDURA E APLIKIMIT DHE AFATI I FUNDIT

Konkursi mbetet i hapur deri më 19.03.2025, në ora 17:00.

Aplikimet për organizimin e Final 4 Liga Unike Meshkujt mund të dorëzohen në email adresën: office@basketbolli.com

Aplikimi duhet të përmbajë:

1. Të dhënat e kompanisë/organizatorit, përfshirë përvojën në organizimin e ngjarjeve sportive;
2. Planin organizativ dhe teknik, duke përfshirë vendin e propozuar për zhvillimin e eventit dhe kapacitetet për përmbushjen e kërkesave të konkursit;
3. Plani financiar, duke treguar burimet e financimit dhe buxhetin e përafërt për organizimin e eventit.
4. PROCEDURA E PËRZGJEDHJES

Bordi i FBK-së do të vlerësojë ofertat sipas kritereve të mëposhtme:

• Përvoja e organizatorit në organizimin e eventeve të ngjashme (30%);
• Kapacitetet infrastrukturore dhe teknike të ofruara (30%);
• Plani financiar dhe garancia e mbulimit të shpenzimeve (40%).

6. INFORMACIONE SHTESË

Për pyetje dhe sqarime shtesë, ju lutemi kontaktoni në email: office@basketbolli.com

Federata e Basketbollit e Kosovës rezervon të drejtën për të refuzuar çdo aplikim që nuk i përmbush kushtet e përcaktuara në këtë konkurs.

Data 13 ishte me fat për basketbollin e Kosovës. Më 13 mars 2015 erdhi lajmi historik për pranimin e Kosovës në FIBA.

Vendimi erdhi pas mbledhjes së Komitetit Ekzekutiv të FIBA, që me votim unanim e pranoi Federatën e Basketbollit të Kosovës si anëtaren e vet të 215-të.

Mbledhja ishte mbajtur në shtëpinë e basketbollit, në Gjenevë të Zvicrës.

Pranimi erdhi pas shumë përpjekjeve për ndërkombëtarizim dhe një pune të madhe të bërë nga Federata e Basketbollit e Kosovës.

Ky lajm ishte një realizim i një ëndrre për të gjithë gjeneratat që kanë kontribuuar në basketbollin e Kosovës me dekada të tëra.

Më pas, basketbollistët/et e Kosovës u pranuan në arenën ndërkombëtare, duke qenë të barabartë.

Përfaqësueset e Kosovës marrin pjesë rregullt në garat evropiane, ashtu si edhe skuadrat kosovare.

Kryetari i Federatës së Basketbollit të Kosovës (FBK), Arben Fetahu ka marrë pjesë në mbledhjen e Bordit të FIBA Europe, që është zhvilluar në Athinë.

Fetahu, i cili është anëtar i Bordit të FIBA Europës mori pjesë në këtë mbledhje, ku janë marrë disa vendime të rëndësishme për basketbollin evropian.

Kjo ishte mbledhja e gjashtë e Bordit të FIBA Europës, që ka mandat 2023-2027.

Eventi që u drejtua nga Federata e Basketbollit të Greqisë, u kryesua nga Presidenti i FIBA ​​Europe, Jorge Garbajosa, ndërsa Presidenti i FIBA-s, Sheikh Saud Ali Al Thani, Sekretari i Përgjithshëm i FIBA-s Andreas Zagklis dhe Drejtori Ekzekutiv i FIBA-s, Europe Kamil Novak ishin të gjithë të pranishëm.

Po ashtu në Athinë është tërhequr shorti për grupet e FIBA EuroBasket Women 2025, derisa për meshkuj shorti do të tërhiqet më 27 mars në Riga.

FIBA EuroBasket Women 2025 do të mbahet në Greqi, Itali, Gjermani dhe Çeki nga 18 deri më 25 qershor.

Bordi do të votojë për të vendosur organizatorët e FIBA ​​EuroBasket 2029, më 23 maj në Riga, Letoni. Aktualisht, në garë për të pritur eventin janë shtatë shtete, pas tërheqjes së Gjermanisë këtë javë.

Bordi pa gjithashtu raporte në vazhdim për garat e klubeve, me një përditësim të veçantë për Euroligën e ardhshme të Femrave, edicionin e parë të kompeticionit me formatin e ri dhe një Final 6 të organizuar në Zaragoza për tre edicione radhazi.

Novak ofroi përditësime mbi projektet e vazhdueshme të FIBA ​​Europe, duke përfshirë “Hoops for Schools” dhe “IcoachGirls” që janë iniciativa Erasmus+, si dhe programet ikonike “WiLead” dhe “FIBA ​​Plus”.

“TIME-OUT 3.0” që filloi në shtator 2024 do të përfundojë në gusht të këtij viti me diplomimin në Shtëpinë e Basketbollit.

Bordi miratoi kërkesën e Federatës Shqiptare për zhvendosjen e Eurobasket FIBA ​​U16 2025, Divizioni C (5-13 korrik) nga Tirana në Korçë dhe më pas EuroBasket FIBA ​​U18 2025, Divizioni C (19-27 korrik) nga Durrësi në Tiranë.

Bordi dëgjoi gjithashtu raporte nga Komiteti Menaxhues për Projekte të Veçanta në lidhje me Fondin për Zhvillimin e Rinisë; “Her World, Her Rules” dhe “Alley-Oop”. 

Mbledhja e ardhshme e Bordit do të mbahet në Riga, Letoni, më 22 maj, i ndjekur nga seminari i përgjithshëm i Sekretarëve të Federatave Kombëtare më 23 maj dhe Asambleja e Përgjithshme më 24 maj.

Kujtojmë se Fetahu është anëtar i Bordit të FIBA Evropës nga maji i vitit 2023.

Qyteti i Prizrenit ishte destinacioni i radhës, ku është mbajtur turneu i Alley Oop në 3x3.

Në turneun e zhvilluar në Prizren kanë marrë pjesë gjashtë ekipe.

Fillimisht janë zhvilluar ndeshjet në grupe, më pas janë zhvilluar gjysmëfinale dhe finalja, ku janë përballur Bero Kingdom dhe Djemt e Prizrenit.

Pas një loje interesante, Bero Kingdom shënoi fitore, duke triumfuar në Prizren, për të siguruar biletën për finalen e madhe në Prishtinë. Skuadra fituese mori shpërblimin prej 300 Euro.

Ky ishte turneu i tretë i Alley Oop, pas Prishtinës dhe Gjakovës, derisa do të vazhdojë edhe në Pejë, Mitrovicë dhe Therandë.

Skuadrat finaliste do të ndeshen në Prishtinë për fituesin e parë të edicionit të parë.

Ky projekt është në partneritet me FIBA Evropën, derisa qëllimi është të masivizojë basketbollin 3x3 në të gjithë Kosovën.