Besim Bytyqi shpallet MVP, Lis Binishi në pesëshen më të mirë

Basketbollisti i Kosovës, Besim Bytyqi, është shpallur Lojtari Më i Vlefshëm (MVP) i FIBA U18 EuroBasket 2026, Divizioni C, pas paraqitjeve të jashtëzakonshme që e udhëhoqën Kosovën drejt titullit të kampionit.

Bytyqi ishte lideri i Dardanëve të rinj gjatë gjithë turneut në Shkodër, duke regjistruar mesatarisht 19.2 pikë, 4.2 kërcime, 3.8 asistime dhe 4.4 topa të vjedhur për ndeshje. Performancat e tij të shkëlqyera i siguruan çmimin individual më prestigjioz të kampionatit.

Në finalen ndaj Andorrës, të fituar nga Kosova me rezultat 91:49, Bytyqi ishte sërish vendimtar me 26 pikë, 4 kërcime, 5 asistime dhe 6 topa të vjedhur, duke kurorëzuar një turne perfekt për Kosovën, që e mbylli garën pa asnjë humbje.

Përveç çmimit të MVP-së, Besim Bytyqi u përfshi edhe në All-Star Five të kampionatit. Në pesëshen më të mirë u përzgjodh edhe Lis Binishi, duke e bërë Kosovën ekipin me më së shumti përfaqësues në formacionin ideal të turneut.

‍