Kosova nis sonte rrugëtimin në Kampionatin Evropian për Shtetet e Vogla

Pritjes i vjen fundi. Kosova në konkurrencën e femrave sonte do të zhvillojë ndeshjen e parë në FIBA Women’s European Championship for Small Countries 2026, që po mbahet në Pejë.

Vajzat e drejtuara nga përzgjedhësi Lorik Kllokoqi do të përballen me Armeninë në takimin e Grupit B, që zhvillohet nga ora 19:00 në palestrën sportive “Karagaç”. K

y duel shënon hapjen e rrugëtimit të Kosovës në kampionatin evropian, ku synimi është një paraqitje sa më e suksesshme para publikut vendas.

Para ndeshjes së Kosovës, programi i ditës hapet me përballjen e Grupit A ndërmjet Shqipërisë dhe Maltës, që nis në ora 16:30.

Kosova garon në Grupin B së bashku me Armeninë dhe Andorrën, ndërsa në Grupin A bëjnë pjesë Shqipëria, Malta dhe Gjeorgjia. Dy kombëtaret më të mira nga secili grup do të sigurojnë kualifikimin në gjysmëfinale.

Me mbështetjen e tifozëve në Pejë, basketbollistet dardane do të kërkojnë ta nisin kampionatin me fitore dhe të hedhin hapin e parë drejt fazës finale të garës.

‍