Dardan Berisha pjesë e programit prestigjioz TIME-OUT 4.0 të FIBA Europe

Kapiteni i përfaqësueses së Kosovës dhe anëtari i Bordit të Federatës së Basketbollit të Kosovës (FBK), Dardan Berisha, do të jetë pjesë e programit prestigjioz TIME-OUT 4.0, organizuar nga FIBA Europe në partneritet me Northumbria University në Mbretërinë e Bashkuar.

TIME-OUT 4.0 është një program i krijuar për t’u ofruar basketbollistëve elitarë mundësi për zhvillim akademik dhe profesional, duke i pajisur pjesëmarrësit me njohuri dhe aftësi në fushën e menaxhimit, biznesit dhe lidershipit.

Programi synon të mbështesë sportistët në zhvillimin e tyre profesional dhe në krijimin e mundësive të reja të karrierës, brenda dhe jashtë sportit.

Më herët, këtë program e kanë përfunduar me sukses edhe Sekretarja e Përgjithshme e FBK-së, Elvira Dushku, Drejtori i Programeve dhe Projekteve Zhvillimore, Granit Rugova, Drejtoresha e Eventeve dhe Basketbollit 3x3, Artina Hasani, si dhe ish-basketbollisti Fisnik Juniku.

Federata e Basketbollit e Kosovës i uron Dardan Berishës suksese në këtë rrugëtim të ri profesional dhe akademik.

‍