Fillon Kampi për FIBA gjyqtaret e basketbollit

Sot ka nisur Kampi për FIBA gjyqtaret e basketbollit, i cili për herë të parë po mbahet në Kosovë.

Ky kamp organizohet me iniciativë të gjyqtares së parë femër nga Kosova në FIBA, Jeta Zeka, një hap i rëndësishëm për zhvillimin dhe fuqizimin e rolit të grave në basketboll.

Federata e Basketbollit e Kosovës (FBK) e mbështet fuqishëm këtë iniciativë, në përputhje me Planin Strategjik 2026-2030 dhe objektivin për rritjen e pjesëmarrjes së vajzave dhe grave në basketboll.

Në kamp po marrin pjesë gjyqtare nga Kosova, Greqia, Mali i Zi, Bullgaria, Austria dhe Hungaria, ndërsa instruktor i kampit është Sinisa Herceg, instruktor i FIBA-s për gjyqtarë.

Përveç pjesës teorike, gjyqtaret do të angazhohen edhe në ndeshjet e Final 4 të Ligës Unike për Femra në Prizren, duke kombinuar zhvillimin profesional me përvojën praktike në terren.

Ky është një moment i rëndësishëm për avancimin e basketbollit dhe barazinë gjinore në sport në Kosovë.

‍