E pesta radhazi për Trepçën

Trepça ka fituar Kupën e Kosovës për herë të pestë radhazi. Mitrovicasit në superfinalen e zhvilluar në Rahovec kanë fituar ndaj Bashkimit 91:72 (16:19, 27:22, 22:12, 26:19).

Përballja në Rahovec ka qenë spektakël i basketboll, me dy tifozeritë që krijuan super atmosferë.

Pjesa e parë ishte kryesisht e baraspeshuar, por dallimi i madh u bë në periodën e tretë, 22:12 për mitrovicasit, që ruajtën epërsinë deri në fund për të fituar 91:72.

Pas ndeshjes janë nderuar gjyqtarët e ndeshjes dhe vëzhguesi i ndeshjes nga Faton Kurshumlija, Komesar i Garave në FBK dhe Artina Hasani, Drejtore e Eventeve dhe basketbollit 3x3 në FBK.

Medaljet e argjendta u ndan nga Shaqir Totaj Kryetar i KK së Prizrenit, Adriatik Rraci zëvendës Sekretar i Përgjithshëm i FBK-së dhe Drejtor i Përfaqësueseve të Kosovës dhe Artan Kurti, Nënkryetar i FBK-së, derisa medaljet e arta nga Faton Peci, Kryetar i KK Mitrovicës, Fidan Shatri, Kryeshef i Agjencisë së Sportit të Kosovës dhe Ibër Alaj, Drejtor i Departamentit të Sportit.

MVP i finales është shpallur Mustapha Amzil i Trepçës, që përfundoi ndeshjen me 22 pikë e 12 kërcime, derisa çmimi iu dorëzua nga zëvendësministrja e Ministrisë së Sportit, Daulina Osmani.

Kryetari i FBK-së, Arben Fetahu dhe Ministri i Sportit, Blerim Gashani dorëzuan trofeun e Kupës për kapitenin e Trepçës, Anes Gashi.

Kjo ishte hera e pestë radhazi që Trepça fiton Kupën, e nënta në përgjithësi.

Duhet theksuar se mes pjesëve me mirënjohje Post Mortum është nderuar Z. Agim Dushi, ku familjari i tij ka pranuar mirënjohjen nga Faton Kurshumlija.

‍