Federata e Basketbollit e Kosovës lanson bashkëpunimin e ri strategjik me kompaninë globale PEAK

Federata e Basketbollit e Kosovës (FBK) me kënaqësi të veçantë, ka nënshkruar marrëveshjen zyrtare me kompaninë ndërkombëtare sportive PEAK, e cila nga sot bëhet Partneri Teknik Zyrtar dhe furnizuesi ekskluziv i pajisjeve sportive të Përfaqësueseve të Kosovës dhe të gjitha grupmoshave të saj.

Ky bashkëpunim shumëvjeçar, i cili fillimisht është nënshkruar për një periudhë katërvjeçare paraqet një hap të rëndësishëm drejt përmirësimit të standardeve profesionale dhe prezantimit të Kosovës me identitet modern e cilësor në arenën ndërkombëtare të basketbollit.

Marrëveshja hyn në fuqi menjëherë dhe do të zyrtarizohet në ndeshjen e parakualifikimeve për FIBA EuroBasket 2029, ku ekipi i Kosovës do të zbres në parket të veshur me pajisjet e reja të PEAK, në përballjen Shqipëri–Kosovë më 30 nëntor 2025.

FBK shpreh vlerësimin dhe besimin e plotë në këtë partneritet, i cili garanton pajisje të standardeve më të larta profesionale për Përfaqësueset A dhe të gjitha ekipet e reja, për të dyja konkurrencat. Ky bashkëpunim pritet të ndikojë drejtpërdrejt në rritjen e performancës, imazhit dhe përfaqësimit dinjitoz të Kosovës në çdo garë ndërkombëtare.

PEAK i bashkohet familjes së basketbollit të Kosovës, duke sjellë përvojën e saj globale dhe teknologjinë e avancuar të prodhimit të pajisjeve sportive, në shërbim të zhvillimit të sportit tonë kombëtar.

‍