Drejtori Ekzekutiv i FIBA Evropës, Kamil Novak, i shoqëruar nga drejtuesit e FBK-së, Kryetari Arben Fetahu dhe Sekretarja e Përgjithshme, Elvira Dushku kanë vizituar sot Komitetin Olimpik të Kosovës, me ç’rast janë pritur nga Presidenti i KOK-ut, Ismet Krasniqi dhe Sekretari i Përgjithshëm, Besim Aliti.

Presidenti Krasniqi falënderoi drejtorin Novak për vizitën dhe përkrahjen që po i jep basketbollit kosovar, ndërsa shprehu vullnetin dhe gatishmërinë e KOK-ut për të fuqizuar edhe më tutje bashkëpunimin me FBK-në për të avancuar basketbollin në Kosovë.

Novak vlerësoi lart punën dhe përkushtimin e FBK-së për avancimin e basketbollit, derisa përmendi organizimet e shumta ndërkombëtare që po i bënë federata, si dhe shprehu konsideratën e lart edhe për emërimin e Fetahut, anëtar i Bordit të FIBA Evropës.

Drejtori Novak do të jetë i pranishëm në ndeshjen Kosova-Malta që zhvillohet në kuadër të Kampionatit Evropian, Divizioni C për meshkuj U16, që sot nisi në Prishtinë, ndërsa më pas do të ndjek edhe takimin e parë të Rrethit të Tretë Parakualifikues për Evropianin 2025, ndërmjet Kosovës dhe Zvicrës, që zhvillohet në Prizren.