FBK pjesë e FIBA Europe U14 Get-Together 2026 në Tallinn

Federata e Basketbollit e Kosovës (FBK) do të përfaqësohet në FIBA Europe U14 Get-Together 2026, që do të mbahet nga 9 deri më 11 tetor 2026 në Tallinn të Estonisë. Aktiviteti organizohet nga FIBA Europe në bashkëpunim me Federatën Estoneze të Basketbollit.

FBK-ja në këtë aktivitet do të përfaqësohet nga Granit Rugova, ndërsa pjesë e delegacionit do të jenë edhe trajnerët Jeton Nixha dhe Zyrije Pireva.

FIBA Europe U14 Get-Together synon shkëmbimin e përvojave dhe zhvillimin profesional në punën me gjeneratat e reja. Programi treditor përfshin një seri klinikash të FIBA-s, me sesione teorike dhe praktike në parket. Gjashtë klinika të FIBA-s janë paraparë gjatë dy ditëve të para të aktivitetit.

Në ditën e fundit do të zhvillohet prezantimi i Federatës Estoneze të Basketbollit, një sesion interaktiv i udhëhequr nga FIBA, si dhe një diskutim paneli me ekspertë të FIBA-s. Folës kryesor i aktivitetit është Dejan Cikiq nga Sllovenia.

Takimi i parë për projektin Hoops4Schools

Në kuadër të qëndrimit në Tallinn, do të mbahet gjithashtu takimi i parë i FIBA-s me partnerët fitues të projektit Hoops4Schools, duke shënuar nisjen e bashkëpunimit dhe koordinimit për realizimin e projektit.

Pjesëmarrja e FBK-së në FIBA Europe U14 Get-Together dhe përfshirja në projektin Hoops4Schools janë në përputhje me orientimin e Federatës drejt zhvillimit të gjeneratave të reja, edukimit të trajnerëve dhe krijimit të programeve të qëndrueshme për zhvillimin e basketbollit.

Aktiviteti në Tallinn do të jetë një mundësi e rëndësishme për shkëmbimin e praktikave dhe përvojave me federatat e tjera evropiane, si dhe për forcimin e bashkëpunimit me FIBA Europe në projektet zhvillimore.

‍