Rregullat, risitë dhe Safeguarding, FBK mbajti takim me trajnerët dhe referët

Federata e Basketbollit e Kosovës (FBK) ka organizuar të dielën takimin e përbashkët me trajnerët dhe referët, me fokus në ndryshimet dhe risitë në Rregullat e Basketbollit për edicionin e ri garues.

Takimi, i mbajtur në Hotel Prishtina, mblodhi trajnerë dhe referë nga Kosova, me synim informimin dhe diskutimin e përbashkët për çështjet që lidhen me zbatimin e rregullave dhe organizimin e garave.

Takimin e hapi Sekretarja e Përgjithshme e FBK-së, Elvira Dushku, ndërsa Granit Rugova, Drejtor i Projekteve dhe Programeve Zhvillimore, i njoftoi pjesëmarrësit me qëllimin dhe mbarëvajtjen e takimit.

Në pjesën kryesore, Xhelal Munini, Komesar i Garave për Kategoritë e Reja në FBK, prezantoi ndryshimet dhe risitë në Rregullat e Basketbollit dhe Propozicionet e Garave për Gjeneratat e Reja për edicionin e ri. Pas prezantimit u zhvillua diskutim me trajnerët dhe referët rreth zbatimit të tyre në garat e kategorive të reja.

Një pjesë e veçantë iu kushtua temës “Safeguarding – Mbrojtja dhe mirëqenia në basketboll”, e prezantuar nga Vlora Braha, Zyrtare për Integritet në FBK. Gjatë prezantimit u theksua rëndësia e krijimit të një ambienti të sigurt, gjithëpërfshirës dhe me respekt për të gjithë pjesëmarrësit në basketboll.

Takimi shërbeu gjithashtu për shkëmbimin e mendimeve dhe forcimin e komunikimit ndërmjet trajnerëve, referëve dhe strukturave të FBK-së, me synim një qasje sa më të unifikuar në zbatimin e rregullave dhe standardeve gjatë edicionit të ri garues.

‍