Dardanët pësojnë nga danezët

Kosova pësoi nga Danimarka me rezultat 62:87 (23:23, 20:14, 8:20, 11:30), në FIBA U16 Kampionatin Evropian, Divizioni B, që po zhvillohet në Shkup të Maqedonisë Veriore.

Çereku i parë ishte kryesisht i niveluar me danezët që kishin epërsi të lehtë, por Dardanët e rinj nuk lejuan shkëputjen e tyre dhe kjo pjesë përfundoi 23:23. Basketbollistët e rinj të Kosovës vazhduan me lojë të mirë në periudhën e dytë, që e fituan 20:14, për të shkuar në pushim me rezultat 43:37.

Megjithatë, perioda e tretë ishte fatale, ku Danimarka e fitoi 8:20, ndërsa shifrat pas 30 minutash ishin 51:57. Në dhjetë minutat e fundit nuk kishte ndryshim të madh dhe Danimarka fitoi 62:87.

Te Kosova u dalluan Egzon Fazliu me 20 pikë e shtatë kërcime dhe Almir Dullovi me 16 pikë.

Dy takimet e fundit në grupe për Kosovën do të jenë ndaj Ukrainës dhe Islandës, të hënën, përkatësisht të martën.

‍