Anëtarja e Bordit të Federatës së Basketbollit të Kosovës (FBK), Teuta Abdullahu, ka përfunduar me sukses programin prestigjioz WiLead, që ka për synim fuqizimin e grave në sport dhe zhvillimin e lidershipit në këtë fushë.
Në një deklaratë për faqen zyrtare të FBK-së, Abdullahu u shpreh:
“WiLead ishte më shumë se një program mësimor - ishte një hapësirë frymëzimi, lidhje dhe fuqizimi. Më dha mjetet për të zhvilluar aftësitë e mia si lidere, vetëbesimin për të përdorur zërin tim në qeverisjen e sportit dhe mundësinë për të mësuar nga dhe së bashku me një rrjet të jashtëzakonshëm grash nga e gjithë Evropa. Ky program forcoi edhe më shumë përkushtimin tim për të pasur një ndikim të qëndrueshëm në basketbollin e vajzave dhe më la thellësisht e motivuar për të vazhduar këtë rrugëtim me qëllim dhe pasion.”
Pjesë e programit ishte edhe qëndrimi në Athinë, ku Abdullahu pati mundësinë të ndjekë nga afër gjysmëfinalet dhe finalen e Kampionatit Evropian të Femrave në Basketboll.
“Si fëmijë, e kisha ëndërr të isha pjesë e kampionateve ndërkombëtare dhe këtë herë, e përjetova atë ëndërr si spektatore, me emocion dhe admirim të madh për fuqinë e sportit të femrave”, shtoi ajo.
FBK e përgëzon për këtë arritje dhe i uron suksese të mëtejshme në rrugëtimin e saj drejt fuqizimit të vajzave dhe grave në basketboll.
