FBK me progres të konsiderueshëm në kuadër të projektit "Safeguarding the Future"

Federata e Basketbollit e Kosovës (FBK) ka bërë progres të konsiderueshëm në kuadër të projektit "Safeguarding the Future", një iniciativë e financuar nga programi Erasmus+ që synon krijimin e mekanizmave të fuqishëm për mbrojtjen në komunitetet e basketbollit.

Ky projekt po realizohet në bashkëpunim me Federatën Estoneze dhe Bullgare të Basketbollit, si dhe me Shoqatën e Trajnerëve të Basketbollit të Kosovës.

Projekti nisi me një takim hapës (kick-off meeting) në janar, ku të gjithë partnerët u mblodhën për të diskutuar në mënyrë të detajuar implementimin e projektit. Gjatë këtij takimi, ata analizuan objektivat kryesore, ndanë përvojat dhe ekspertizën e tyre, dhe planifikuan hapat e ardhshëm për të siguruar një zbatim efektiv dhe të suksesshëm të iniciativës.

Si pjesë e këtyre aktiviteteve, FBK, së bashku me partnerët nga Estonia dhe Bullgaria, ka zhvilluar një vlerësim të detajuar të nevojave në tre vende: Kosovë, Bullgari dhe Estoni. Procesi filloi me mbledhjen e të dhënave nga grupe të ndryshme të interesit, duke identifikuar nevojat specifike të secilit komunitet të basketbollit. Bazuar në këtë analizë, u zhvilluan politika të mbrojtjes të përshtatura sipas kërkesave unike të secilit vend. Këto politika u shoqëruan me procedura dhe udhëzime shtesë për të ndihmuar në zbatimin efektiv në secilën federatë kombëtare.

Për më tepër, u zhvilluan konsultime me grupet e interesit në Kosovë, Bullgari dhe Estoni, ku morën pjesë trajnerë, gjyqtarë, prindër, lojtarë dhe anëtarë të federatave. Në Kosovë, në këto konsultime morën pjesë 20 individë nga të gjitha kategoritë e komunitetit të basketbollit.

Ky proces konsultimi ka qenë thelbësor për të siguruar që politikat e zhvilluara janë gjithëpërfshirëse dhe efektive. Reagimet e mbledhura nga grupet e interesit kanë ndihmuar në përmirësimin dhe finalizimin e politikave.

Për të siguruar që këto politika, udhëzime dhe procedura janë në përputhje me praktikat më të mira ndërkombëtare, FBK bashkëpunoi ngushtë me ekspertë të fushës nga Mbretëria e Bashkuar.

FBK, në bashkëpunim me federatat e basketbollit të Estonisë dhe Bullgarisë, mbetet e përkushtuar për të vazhduar këto përpjekje dhe për të promovuar masat e mbrojtjes në të gjitha nivelet e basketbollit, duke siguruar një mjedis të sigurt dhe mbështetës për të gjithë pjesëmarrësit.

‍