Përfaqësues të institucioneve, federatave dhe të komunitetit sportiv janë bashkuar sërish në platformën “Tryeza e Sportit”, e gjashta më radhë e organizuar nga Ministria e Sportit në bashkëpunim me Komitetin Olimpik të Kosovës.

Në këtë ngjarje ka marrë pjesë edhe Sekretarja e Përgjithshme e Federatës së Basketbollit të Kosovës, Elvira Dushku dhe Zëvendës Sekretari i Përgjithshëm dhe Menaxheri i Përfaqësueseve, Adriatik Rraci.

Në Tryezën e gjashtë të Sportit është diskutuar për risitë e Ligjit të Sportit, nga të cilat përfiton i gjithë komuniteti sportiv në Republikën e Kosovës. Temat të cilat janë trajtuar gjatë Tryezës ishin:

- ndryshimet e nevojshme statutore të organizatave sportive

- detyrat dhe përgjegjësitë e federatave, si dhe procedura e lejimit të veprimtarisë së tyre

- statusi i klubeve sportive dhe regjistrimi i tyre

- licencimi i trajnerëve, instruktorëve dhe agjentëve sportiv

- kujdesi për sportistët, masat për mbrojtjen e të drejtave dhe mirëqenies së sportistëve

- detyrimet kontraktuale ndaj sportistëve

- zhvillimi i sportit në të gjitha nivelet dhe garat ndërkombëtare

- procedura e regjistrimit të skollave të sportit, qendrave të fitnesit dhe qendrave sportive

- sistemi i ri i financimit të sportit, lidhja me performancën, transparencën dhe auditimin

- të drejtat e transmetimit dhe reklamat gjatë garës sportive

- drejtësia sportive

- papajtueshmëria në ushtrimin e funksioneve në sport, dhe

- tema tjera nga nenet përkatëse të Ligjit.

Pjesëmarrës ishin përfaqësues nga MKRS, MPB, KOK, komunat, Agjencia Anti-Doping, Qendra e Mjekësisë Sportive, Komiteti Paralimpik, Olimpiada Speciale dhe Shoqata e Sporteve për të Shurdhërit në Kosovë.

U diskutua gjithashtu për zhvillimin e sportit në të gjitha nivelet dhe garat ndërkombëtare, procedurat e regjistrimit të shkollave të sportit, qendrave të fitnesit dhe qendrave sportive, sistemi i ri i financimit të sportit, lidhja me performancën dhe transparencën e auditimin.

Në hapje folën zëvendësministrja Daulina Osmani dhe presidenti i Komitetit Olimpik të Kosovës, Ismet Krasniqi.