Kosova është kualifikuar në finale të FIBA U18 Women’s EuroBasket, Divizioni C, që po zhvillohet në Prishtinë.

Vashat e Kosovës në gjysmëfinale kanë mundur Shqipërinë me shifrat 64:48 (18:7, 16:15, 11:16, 19:10).

Kosova e nisi ndeshjen më mirë, duke pasur epërsi në çerekun e parë deri në 13 pikë, 18:5, derisa kjo pjesë përfundoi 18:7. Në periudhën e dytë ngritën më shumë epërsinë në 34:18, sidoqoftë në fund të pjesës së parë, vashat kuqezi shënuan katër pikë radhazi për 34:22.

Në periodën e tretë, Shqipëria ngushtoi shifrat, ashtu si edhe në dhjetë minutat deri pranë shifrave në 51:47, por në këtë moment ‘shpërtheu’ Flutura Mehmeti me tri treshe radhazi, derisa Kosova triumfoi në fund 64:48.

Mehmeti ishte më e mira te Kosova me 20 pikë e dhjetë kërcime, duke u ndihmuar nga Malvina Haziri me dhjetë pikë e pesë kërcime, Etna Rexhepi me 13 pikë e nëntë kërcime dhe Gerta Hoti me dhjetë pikë e tetë kërcime.

Kosova në finale të dielën nga ora 19:30 do të ndeshet me Azerbajxhanin.

Azerbajxhani regjistroi fitoren e katërt në katër ndeshje, ku në gjysmëfinale mundi bindshëm Qipron 66:49, derisa për vendet 5-7, Malta mposhti Armeninë 39:57.

Të dielën (nesër) për vendet 5-7 Malta me Gjeorgjinë. Për vendin e tretë do të përballen Qipro dhe Shqipëria.