Kosova përfundon rrugëtimin në basketbollin 3x3 në Taranto 2026

Përfaqësueset e Kosovës në basketbollin 3x3 kanë përfunduar garat në Lojërat Mesdhetare Taranto 2026, pas ndeshjeve të zhvilluara gjatë fundjavës në konkurrencën e meshkujve dhe të femrave.

Në konkurrencën e meshkujve, Kosova zhvilloi të dielën ndeshjen e dytë të fazës së grupeve, përballë Turqisë, në një takim vendimtar për kualifikim në çerekfinale. Ndeshja përfundoi me rezultat 21:11 në favor të Turqisë, rezultat që e la Kosovën jashtë fazës së eliminimit direkt.

Në ndeshjen e parë të Grupit C, të zhvilluar të shtunën ndaj Portugalisë, Kosova pësoi humbje me rezultat 17:12.

Në konkurrencën e femrave, Kosova zhvilloi të shtunën të dyja ndeshjet e fazës së grupeve. Në takimin e parë, Përfaqësuesja jonë u mposht nga Greqia me rezultat 18:9, ndërsa në ndeshjen e dytë pësoi humbje 18:7 ndaj Italisë. Me këto dy rezultate, Kosova nuk arriti të siguronte kualifikimin në fazën e eliminimit direkt.

Me përfundimin e garave në të dyja konkurrencat, mbyllet edhe paraqitja e Kosovës në basketbollin 3x3 në Lojërat Mesdhetare Taranto 2026.

‍