Vëllaznimi kampion i Ligës Unike në konkurrencën e meshkujve. Në Final 4 të zhvilluar në Prishtinë më 26 dhe 27 mars, Vëllaznimi shënoi fitore në finale ndaj Sigal Prishtinës.
Vëllaznimi në gjysmëfinale mposhti Yllin, ndërsa Prishtina mposhti Besëlidhjen.

Në “Pallatin e Rinisë dhe Sportit” u zhvillua një dramë e vërtetë, ku u desh që vendimtarë të jenë sekondat e fundit të kësaj ndeshjeje, e cila shkoi edhe në vazhdime.

Kuqezinjtë fituan ndeshjen me rezultat 91:88, derisa MVP i finales u shpall basketbollisti vendor Arian Azemi, i cili grumbulloi 24 pikë, gjashtë kërcime dhe tri asistime.

Superliga Femrat vazhdon këtë fundjavë me ndeshje interesante, teksa zhvillohet java e 20-të.
Në ndeshjet e fundit të garave të rregullta, çdo përballje është bërë gjithnjë e më interesante dhe e rëndësishme, ku në parket zhvillohet luftë për çdo top dhe sekondë.

Derbi i javës do të luhet mes rivaleve të qytetit, ku Peja 03 dhe Penza do të ndeshen në “Karagaçi”. Peja ka 12 fitore dhe shtatë humbje, ndërsa Penza ka nëntë fitore dhe 10 humbje.

Një sfidë tjetër interesante pritet edhe mes Prishtinës dhe Junior 06 Moni Bau, që do të përballen në “Pallatin e Rinisë dhe Sportit”. Prishtina, që mban vendin e tretë, ka regjistruar  11 fitore dhe tetë humbje, ndërsa Junior 06 ka pesë fitore dhe  14 humbje.

Bashkimi pret Trepçën në Prizren. Kampionet në fuqi dhe lidere të tabelës kanë 17 fitore dhe një humbje, ndërsa “Xehëtaret” kanë dy fitore dhe 17 humbje në garat e rregullta të kampionatit.

Superliga e Femrave - Java 20

KBF Peja 03 - KBF Penza
KBF Prishtina - KBF Junior 06
KBF Bashkimi - KBF Trepça

ProCredit Superliga vazhdon këtë fundjavë me përballje tejet interesante, teksa kampionati po i afrohet fundit të garave të rregullta. Çdo ndeshje tashmë ka peshë të madhe, me skuadrat që luftojnë për pozitat më të mira në tabelë.

"Xehëtarët" do të presin prizrenasit në “Minatori”, me synimin për të mbajtur pozitën e dytë. Trepça ka regjistruar 16 fitore dhe 9 humbje, ndërsa Proton Cable është në vendin e fundit me 5 fitore dhe 20 humbje.

Një tjetër përballje e madhe do të luhet të shtunën mbrëma, ku Bashkimi përballet me Golden Eagle Yllin. Therandasit janë në formë të shkëlqyer me katër fitore radhazi, ndërsa Bashkimi hyn në këtë duel me 18 fitore e 7 humbje, Ylli ka një bilanc prej 12 fitoresh dhe 13 humbjesh.

Derbi i madh i kësaj jave zhvillohet të dielën, ku Peja pret Sigal Prishtinën në “Karagaqi”. Pejanët kanë 13 fitore dhe 12 humbje, ndërsa prishtinasit ndajnë të njëjtin bilanc me Trepçën—16 fitore dhe 9 humbje. Një përballje që pritet me padurim nga të gjithë.

Në “Shani Nushi”, Vëllaznimi synon të vazhdojë paraqitjet pozitive kundër Borës. Gjakovarët kanë 12 fitore dhe 13 humbje, ndërsa Bora ka arritur 8 fitore dhe ka pësuar 17 humbje.

Orari - Java 26

E shtunë, ora 20:00
Trepça – Proton Cable Prizreni
Bashkimi – Golden Eagle Ylli

E diel, ora 20:00
Peja – Sigal Prishtina
Vëllaznimi – Bora

Në Mitrovicë gjatë fundjavës u zhvillua Final 4 i Kupës së Kosovës për Super Ligën U14 te meshkujt.

Finalja u zhvillua mes KB Trepça Ipko dhe KB Kerasan, që përfundoi 52:63 për Kerasanin.

MVP u shpall Lorik Pruqi i KB Kerasan .