Golden Eagle Ylli ka barazuar serinë finale në 2:2, ku titulli do të vendoset të enjten në Mitrovicë.

Therandasit fituan ndaj mitrovicasve me rezultat 75:71 (13:15, 16:18, 20:13, 26:25), në një ndeshje mjaft interesante.

Të dy skuadrat treguan dëshirën e madhe për të fituar nga fillimi i ndeshjes, ku çereku i parë ishte i barabartë me ‘Xehetarët’ që kishin deri në katër pikë epërsi, derisa kjo pjesë përfundoi 13:15. Lojë e barabartë u zhvillua në periudhën e dytë, ku mysafirët kishin deri në gjashtë pikë epërsi, derisa pjesa e parë përfundoi 29:33.

Megjithatë, Ylli rikthehet fuqishëm në periudhën e tretë, për të përmbysur shifrat në 40:38, derisa rezultati pas 30 minutash ishte 49:46. Therandasit u shkëputën edhe më shumë në dhjetë minutat e fundit, ku kishin epërsi deri në 12 pikë, 64:52, dhe deri në fund nuk e lëshuan epërsinë, duke triumfuar 75:71.

Te vendasit u dalluan Jalen Nesbitt me 15 pikë e nëntë kërcime dhe Alonzo Verge JR me 27 pikë, gjashtë kërcime e shtatë asistime, kurse te mitrovicasit u dalluan Kevin Capers me 17 pikë, pesë kërcime e gjashtë asistime, Dardan Kapiti me dhjetë pikë e 11 kërcime dhe Darnell Edge me 15 pikë e gjashtë kërcime.

Trepça ka triumfuar në ndeshjen e tretë të serisë finale ndaj Golden Eagle Yllit me shifrat 85:78 (11:21, 26:10, 18:23, 30:24), duke udhëhequr 2:1.

Sfida e ardhshme zhvillohet të dielën në Therandë, derisa kampion shpallet skuadra që shënon tri fitore.

Mysafirët e nisën ndeshjen më mirë, me një seri prej 2:10 dhe gjatë gjithë çerekut të parë ishin në epërsi, duke e fituar këtë pjesë 11:21. Por, mitrovicasit shpejt u rikthyen dhe në periudhën e bënë përmbysjen, duke shkuar në pushim me shifrat 37:31.

Ylli nuk dorëzohen dhe kalon në epërsi 39:41, e më pas zhvillohet lojë e barabartë, ku shifrat pas 30 minutash ishin 55:54. Në dhjetë minutat e fundit dhe vendimtare, Trepça ishte më e mirë, ku u shkëput në 73:63 dhe ruajti epërsinë për të triumfuar 85:78.

Më i miri te vendasit ishte Kevin Capers me 19 pikë, shtatë kërcime e shtatë asistime, kurse te mysafirët, Alonzo Verge JR me 28 pikë e pesë asistime.

Kryetari i Federatës së Basketbollit të Kosovës (FBK), Arben Fetahu dhe Sekretarja e Përgjithshme e FBK-së, Elvira Dushku, kanë marrë pjesë në Asamblenë e Përgjithshme të FIBA Evropës.

Asambleja e Përgjithshme e FIBA Evropës është mbajtur më 11 maj në Portoroz të Sllovenisë.

Asamblenë e Përgjithshme e ka kryesuar Presidenti i FIBA Europes, Jorge Garbajosa, ku ishin të pranishëm edhe Presidenti i FIBA-s, Sheikh Saud Ali Al Thani, Sekretari i Përgjithshëm i FIBA-s, Andreas Zagklis, Drejtori Ekzekutiv i FIBA-s për Evropë, Kamil Novak dhe anëtarët e Bordit të FIBA Europe, ku është edhe Kryetari i FBK-së.

Matjaz Han, Ministri slloven për Ekonominë, Turizmin dhe Sportin, i uroi mirëseardhjen delegatëve dhe shprehu krenarinë e tij, që organizimi po mbahet në Slloveni, një vend i apasionuar pas sportit dhe veçanërisht basketbollit.

Garbajosa i kushtoi vëmendje të veçantë përpjekjeve të FIBA Europe për të sjellë ide dhe inovacione të reja në basketboll, si për garat e klubeve ashtu edhe ato kombëtare, duke i dhënë ende prioritet programeve bazë dhe zhvillimit.

Në fjalimin e tij, Sekretari i Përgjithshëm i FIBA-s, Zagklis u ndal në pozicionin e lojës së basketbollit të Evropës në hartën e basketbollit botëror. Ai mori si shembull organizimin e Botërorit të vitit të kaluar. Ai gjithashtu përsëriti rëndësinë e strategjisë së FIBA-s dhe tre shtyllave të saj - Fuqizimi i Federatave Kombëtare, Gratë në Basketboll dhe Formimi i garave ndërkombëtare të klubeve - dhe synimet e zhvillimit të basketbollit të të rinjve; duke e bërë 3x3 sportin urban më emocionues; arritjen e përvojës në organizimin e garave të ekipeve kombëtare; qëndrueshmërinë dhe inovacionin.

Një sërë ndryshimesh në aktet nënligjore të FIBA Europe u miratuan nga Asambleja e Përgjithshme. Asambleja e Përgjithshme e FIBA Europe 2025 do të mbahet në Letoni, ndërsa sesioni i vitit 2026 do të organizohet nga Federata e Basketbollit të Islandës në Reykjavik.

Më 10 maj, Dushku ka marrë pjesë në takimin e Sekretarëve të Përgjithshëm të Federatave anëtare të FIBA Europe-s, që po ashtu u zhvillua në Slloveni, ku është diskutuar për tema të rëndësishme në basketbollin ndërkombëtar. Për ditëlindjen e saj, FIBA Evropa i ka bërë një befasi, Sekretares së Përgjithshme të FBK-së, duke ia festuar, pikërisht në mbledhjen e Sekretarëve të Përgjithshëm të Federatave anëtare të FIBA Europe-s. 

Mbledhja e katërt e Bordit të FIBA Europe, me mandat 2023-2027, është mbajtur të premten në Portoroz të Sllovenisë, ku mori pjesë edhe Fetahu.

Gjatë takimit u diskutuan tema të rëndësishme si EuroLiga e Femrave 2024-25, Garat e Klubeve 2023-24, Garat e Ekipeve Kombëtare, si dhe Bordi miratoi datat për raundin e dytë Parakualifikues të Kupës Botërore të Basketbollit FIBA 2027 në gusht 2025 (2, 6, 9, 13, 16 dhe 20 gusht). Mbledhja e radhës e Bordit do të mbahet në Stamboll, Turqi, më 28 nëntor 2024.